Викендов се одржува вториот модул на Школата за политики при Претседателскиот центар за политичко образование со поддршка од партнерската фондација „Фридрих Еберт“ – Скопје.
Учесниците на Школата за политики во рамки на вториот модул имаат можност да ги унапредат своите знаења на социо-економски теми поврзани со дигитализација и иновации во бизнисот, јавниот сектор и образованието, современи социјалдемократски и конзервативни социоекономски политики, вклученост и застапеност на лицата со попреченост во јавниот и политичкиот живот, родова еднаквост од економска и политичка перспектива и слично.
На вториот модул на Школата за политики се обрати проф. д-р Александар Љ. Спасов, претседател на Програмскиот совет на Претседателскиот центар за политичко образование, а воедно и советник на претседателот за надворешна политика, внатрешна политика и уставни прашања, при што порача дека на вториот модул на Школата за политики ќе се даде критички осврт на економските модели и политики и ќе се овозможи дебата за клучни прашања од различни општествени сфери со особен нагласок на зелената економија, иновациите и процесот на дигитализација во економијата, но и промоцијата на правата на маргинализираните групи и нивната инклузија во општествените процеси.
Вториот модул се реализира со учество на еминентни предавачи и обучувачи од земјата и од странство, меѓу кои се и универзитетските професори д-р Ванчо Узунов и д-р Трајко Славески, членот на националната политичка платформа “Možemo” од Загреб, Теодор Целакоски, поранешната амбасадорка на Република Северна Македонија во Кралството Шведска, проф. д-р Александра Наќева-Ружин, главниот извршен директор на фондацијата „МК2025“ и член на Програмскиот совет на Претседателскиот центар, Никица Мојсоска-Блажевски и др.
Школата за политики е централна активност на Претседателскиот центар за политичко образование којшто е под покровителство на претседателот Стево Пендаровски. Во Школата за политики учествуваат 43 млади професионалци на возраст од 25-35 години, со различно професионално искуство, кои веќе се или имаат интерес да бидат активни учесници во општествениот и политичкиот живот во државата. Целта на Школата е да се поврзат учесници од различно потекло коишто имаат желба со стекнатите знаења и вештини да придонесат за позитивен развој на општеството.
Претседателскиот центар за политичко образование е основан од претседателот Пендаровски во партнерство со фондацијата „Фридрих Еберт“, Меѓународниот републикански институт (ИРИ), фондацијата „Конрад Аденауер“, фондацијата „МК2025“, Националниот демократски институт (НДИ) и Фондацијата за демократија на Вестминстер. Активностите на Претседателскиот центар се насочени кон промоција на културата на дијалог во духот на демократските вредности и придонесуваат за сеопфатно вклучување на политичкото образование во формалниот и неформалниот образовен систем.
Пронајдете не на следниве мрежи:
