Дејвид Бекам следната недела ќе добие ѕвезда на Холивудската патека на славните, а неговата сопруга Викторија Бекам ќе игра посебна улога на оваа церемонија.
Тој ќе биде почестен со ѕвезда на Холивуд Булевар на 12 јуни. Неговата сопруга Викторија, која сè уште не добила ѕвезда на Холивудската патека на славните, ќе биде со својот сопруг на овој важен настан како еден од гостите-говорници, заедно со Том Круз.
„Признанието на Бекам доаѓа во вистинско време додека САД се подготвуваат за Светското првенство“, изјави продуцентката на „Прошетката на славните“, Ана Мартинез.
Таа додаде дека улогата на Бекам во подигнувањето на профилот на фудбалот во САД и неговото трајно влијание врз спортот, забавата и глобалната култура ја прават оваа чест значајна, пишува „Хело“.
Тој ќе биде 2.849-та ѕвезда на Холивудската патека на славните, придружувајќи им се на познати личности како Мајли Сајрус и Елвис Присли, како и на спортисти како Мухамед Али. За да добие ѕвезда, лицето мора прво да биде номинирано во категориите што опфаќаат работа во филмот, телевизијата, радиото и театарот.
Според Трговската комора на Холивуд, лицето мора да ги исполнува следниве критериуми: „Професионални достигнувања, долговечност во категоријата од пет или повеќе години, придонес во заедницата и гаранција дека познатата личност ќе присуствува на церемонијата на отворањето доколку биде избрана“.
Ѕвезда на Холивудската патека на славните е едно од најновите признанија на листата на почести што Бекам ги добил во текот на неговата кариера. На крајот од минатата година, тој беше прогласен за витез во замокот Виндзор.
The post Дејвид Бекам следната недела ќе добие ѕвезда на Булеварот на славните appeared first on Во Центар.
