Европската комисија соопшти дека денеска ја исплатила втората рата од 1,5 милијарди евра, во рамки на вкупната макрофинансиска помош за Украина до 18 милијарди евра.
„Денешната втора исплата на Украина од 1,5 милијарди евра ја покажува силната поддршка на ЕУ за Украина. Земјата постигна значителен напредок во трансформативните реформи, како што е владеењето на правото. Ова исто така ќе ги олесни меѓународните напори за обнова и ќе ја поддржи Украина на нејзиниот европски пат“, рече претседателката на Комисијата, Урсула фон дер Лајен.
Оваа поддршка, вели ЕК, ќе и помогне на Украина да продолжи да исплаќа плати и пензии и да ги одржува основните јавни услуги, како што се болниците, училиштата и домувањето за раселените лица.
„Тоа, исто така, ќе и овозможи на Украина да обезбеди макроекономска стабилност и да ја обнови критичната инфраструктура уништена од Русија во нејзината војна за агресија, како што се енергетската инфраструктура, водните системи, транспортните мрежи, патиштата и мостовите“, посочува ЕК.
