Европската унија соопшти дека вовела нови санкции против пет ирански судии за наводни сериозни кршења на човековите права, како и против водечка фигура во сајбер група обвинета за помагање на Техеран во цензурирањето и потиснувањето на информациите.
Советот на ЕУ наведува дека Нима Салехи, основачот на иранската хакерска и сајбер група „Ашијане“, е цел на санкциите. Според Брисел, оваа група тесно соработува со иранската сајбер полиција (ФАТА) и Корпусот на исламската револуционерна гарда (ИРГЦ), кои веќе се под санкции на ЕУ.
Во официјалното соопштение на Советот на ЕУ, имињата на санкционираните судии не беа објавени, но беше нагласено дека оваа мерка е директен одговор на судскиот притисок и потиснувањето на слободите во таа земја.
Високата претставничка на ЕУ за надворешна политика и безбедност, Каја Калас, ја објави оваа одлука на социјалната мрежа X.
„Додека Техеран ги интензивира своите внатрешни конфронтации, Европската Унија ќе продолжи да ги смета за одговорни сите оние кои учествуваат во репресијата“, рече Калас.
Со воведувањето на овие нови мерки, вкупниот број на лица од Иран кои се санкционирани од ЕУ (вклучувајќи забрани за патување и замрзнување на средства) се зголеми на 269, додека 53 економски субјекти се исто така под санкции.
The post ЕУ воведе нови санкции кон Иран: Пет судии и клучен член на хакерската група „Ашијане“ се на црната листа appeared first on Во Центар.
