Уште од античко време, медот се користи и како храна и како природен лек, а современите истражувања потврдуваат дека овој пчелен производ може да има бројни придобивки за телото.
Богат е со биоактивни соединенија, има антибактериски својства и може да биде дел од балансирана исхрана. Еве што го издвојува.
1. Содржи вредни хранливи материи
Една лажица мед (околу 20 грама) има околу 60 калории и 17 грама јаглехидрати, додека мастите и протеините практично отсуствуваат. Иако е претежно шеќер, содржи мали количини на витамини и минерали, како и растителни соединенија, особено полифеноли, кои имаат заштитна улога во организмот.
2. Богат со антиоксиданси
Помалку преработените, особено потемните видови мед, содржат флавоноиди и фенолни киселини.
Овие антиоксиданси помагаат во борбата против слободните радикали, кои се поврзани со стареењето на клетките и развојот на хронични заболувања како што се дијабетес тип 2 и срцеви заболувања.
3. Може да биде поевтин избор од белиот шеќер
Иако медот влијае и на зголемувањето на нивото на гликоза во крвта, одредени студии укажуваат дека неговите антиоксиданси можат да имаат заштитен ефект врз метаболизмот. Исто така, се споменува и можно влијание врз зголемувањето на адипонектинот, хормон кој придонесува за подобра регулација на шеќерот.
Сепак, се препорачува претпазливост и умерен внес кај лица со дијабетес.
4. Поддршка на здравјето на срцето
Медот е поврзан со намалување на крвниот притисок, подобрување на липидите во крвта и заштита на клетките од оштетување.
Исто така, содржи прополис, супстанца произведена од пчели, која може да има позитивен ефект врз нивото на холестерол и триглицериди. Сепак, потребни се дополнителни истражувања кај луѓето.
5. Помага при рани и изгореници
Низ историјата се користел за лекување на оштетувања на кожата. Анализите на голем број студии покажале дека може да биде корисен за благи изгореници и инфицирани рани. Посебно се споменува медот Манука, познат по своето силно антибактериско дејство.
6. Ги ублажува кашлиците кај децата
Во случај на инфекции на горните дишни патишта, медот може да го намали интензитетот и времетраењето на кашлицата, а воедно да го подобри сонот на детето. Важно е да се нагласи дека не треба да се дава на деца под една година поради ризикот од ботулизам.
7. Лесно е за употреба
Лесно се вклопува во секојдневната исхрана, може да заслади чај, кафе, јогурт или да се користи во подготовка на јадења и десерти.
Сепак, треба да се запомни дека сепак станува збор за шеќер, па затоа претерувањето со него може да придонесе за зголемување на телесната тежина и зголемен ризик од метаболички и срцеви заболувања, објавува Healthline.
The post Здравје во лажица: 7 неверојатни придобивки од медот – вистинска витаминска бомба appeared first on Во Центар.
Пронајдете не на следниве мрежи:
