Црниот дроб има способност да се лекува, но брзината и можноста за тоа лекување зависат од тоа колку е сериозна штетата. Темата повторно се актуелизираше по новата сезона на „Фармата на Кларксон“, во која водителот Џереми Кларксон , познат и по неговата емисија „Топ Гир“, откри дека лекарите му наредиле да престане да пие алкохол поради здравствени проблеми.
Во случај на алкохолен замастен црн дроб, NHS вели дека состојбата може да се подобри по неколку недели апстиненција од алкохол. Ова е првата фаза на заболување на црниот дроб поврзано со алкохол и може да се појави по само неколку дена обилно пиење. Кларксон во емисијата рече: „Не можам да пијам затоа што црниот дроб ми е заебан“, додека неговата партнерка Лиса Хоган се обиде да го охрабри велејќи: „Твојот црн дроб ќе се опорави“, пишува LADbible.
Закрепнувањето зависи од фазата на оштетување.
Втората фаза е алкохолен хепатитис, кој обично се јавува по долготрајна злоупотреба на алкохол. Симптомите може да вклучуваат жолтица, болка во горниот дел на стомакот, замор, треска и гадење. Оваа состојба може да биде и реверзибилна, но бара целосно и трајно прекинување на консумирањето алкохол.
Третата и најтешка фаза е цироза, каде што црниот дроб е веќе сериозно оштетен од лузни. Националната здравствена служба (NHS) вели дека оваа штета е неповратна, но престанокот со пиење може да спречи понатамошно влошување. Доколку лице со цироза продолжи да пие, NHS вели дека има помалку од 50 проценти шанси да живее уште пет години.
Откажувањето од алкохол не е добро само за црниот дроб, туку и за срцето. Британската фондација за срце наведува дека прекумерното пиење алкохол може да го зголеми ризикот од срцев удар и мозочен удар, палпитации и аритмии. Кларксон не откри детали за состојбата на црниот дроб, но подоцна рече дека медицинскиот преглед покажал дека неговиот црн дроб е „добро“.
The post Колку време е потребно за црниот дроб да се опорави од алкохол? appeared first on Во Центар.
