Студ, глад и очај зафатија стотици илјади луѓе кои останаа без покрив над главата по земјотресот во Турција и Сирија, најсмртоносниот во регионот во последните децении.
Спасувачите се тркаат со времето, но со секој изминат час се намалуваат шансите да се најдат преживеани под урнатините.
Докторката и член на ХГСС Ивон Ланчиќ беше прашана од Index.hr колку долго луѓе можат да преживеат заробени под урнатините.
„Не можеме точно да предвидиме колку долго човек може да преживее под урнатините, но можеме да сметаме дека сè зависи првенствено од снабдувањето со кислород. Ако не може да дише, ако нема никаква комуникација со надворешен проток на воздух, ќе се задуши во првите 20 до 60 минути“, вели Ланчиќ, која учествуваше во потрагата по земјотресот во Петриња.
Доколку имаат доволно воздух и вода, заробените под урнатините можат да преживеат и до 21 ден.
„Ако немаат вода, просекот е три до четири дена. Во просек, луѓето можат да останат без храна 13 до 14 дена, иако најдолгиот забележан период е 21 ден. Тука, секако, зборуваме за здрава и млада личност. Помал процент на преживување во овие ситуации имаат постарите, болните и децата“, рече Ланчиќ.
Последните денови од Турција пристигнуваат бројни вести за деца и бебиња кои се пронајдени живи.
Десетгодишното момче кое поминало 90 часа под урнатините со својата мајка е спасено во провинцијата Хатај.
Исто така во Хатај, седумгодишното девојче Асја Донмез беше спасено по 95 часа и пренесено во болница.
„Ваквите вести се поатрактивни, па ги слушаме. Децата се всушност многу почувствителни на вакви ситуации, особено на ниски температури. Децата губат топлина многу побрзо. Површината на главата на детето, која е најчесто изложена, е од 18 до 20 проценти од вкупната површина на телото. Кај возрасните, тоа е околу 9 проценти. Затоа мало дете многу побрзо ја губи топлината“, вели Ланчиќ.
Во овие ситуации важна улога играат и резервите на маснотии, кои децата ги имаат помалку, забележува таа.
Во текот на ноќта температурите во најпогоденото подрачје од земјотресот се спуштаат под нулата.
„Ниските температури не се погодни за стапката на преживување“. Сепак, температурата под урнатините е малку повисока отколку на отворено. Преживеаните бебиња и доенчиња најверојатно мајката ги греела со своето тело“, изјави лекарката.
Спасувачите со денови ќе пронаоѓаат преживеани под урнатините, вели Ланчиќ.
Посебно оние кои поминаа без повреди. Оние кои се здобиле со некои драстични повреди починале во првите 24 до 48 часа. Оние кои се малку подебели веројатно ќе преживеат подолго од другите, вели Ивон Ланчиќ.
Овонеделниот земјотрес е седма најсмртоносна природна катастрофа на векот, со повеќе смртни случаи од цунамито во Јапонија во 2011 година и блиску зад земјотресот во соседен Иран во 2003 година, во кој загинаа 31.000 луѓе.
