Генералното собрание на ОН синоќа усвои резолуција со која се повикува на сеопфатен и траен мир во Украина. Резолуцијата ја предложија Украина и уште 45 земји, а 107 земји гласаа „за“, вклучувајќи ги речиси сите членки на ЕУ, како и Македонија. Русија беше јасно против резолуцијата, додека Унгарија, Србија и САД гласаа „воздржано“.
Украинскиот претседател Володимир Зеленски изрази благодарност до 107-те земји што ја поддржаа Украина во Обединетите нации во одбрана на животот на социјалната мрежа „X“, а прикачи и фотографија од табелата на која се гледа која земја гласала.
„Генералното собрание ја усвои нашата резолуција во поддршка на траен мир, со јасни повици за целосен прекин на огнот и враќање на нашиот народ. Ова се правилни и неопходни чекори и ние ќе продолжиме активно да работиме на постигнување мир со нашите партнери“, напиша Зеленски.
Во резолуцијата се истакнува регионалното и глобалното влијание на војната и се изразува „длабока загриженост“ за континуираните напади на Русија врз „цивили, цивилни објекти и критична енергетска инфраструктура“ што ја влошуваат хуманитарната ситуација.
Беше потврдена силната посветеност на Генералното собрание на „суверенитетот, независноста, единството и територијалниот интегритет“, вклучувајќи ги и територијалните води на Украина.
The post Македонија гласа за траен мир во Украина, усвоена резолуцијата на ОН appeared first on Во Центар.
