Секторот за киберкриминал при Министерството за внатрешни работи информира дека во текот на последните 24 часа, како дел од редовните активности за следење на дигиталниот простор, на социјална мрежа е откриена објава со содржина што укажува на можна самоубиствена намера од страна на малолетен корисник.
Како што наведуваат од Министерството за внатрешни работи, веднаш по приемот на информацијата, преземени се итни и координирани дејствија, при што се преземени сите потребни мерки и активности за утврдување на идентитетот и локацијата на лицето.
„За кратко време, корисникот беше пронајден, интервјуиран и утврдено е дека е безбеден и во добра состојба. За инцидентот се известени и родителите, кои се запознаени со целокупната ситуација и понатамошните чекори. Овој инцидент уште еднаш ја нагласува важноста од внимателно следење на однесувањето на младите луѓе во дигиталниот простор. Ги повикуваме родителите да одржуваат редовна и отворена комуникација со своите деца, да покажуваат интерес за нивните активности на социјалните мрежи и веднаш да реагираат кога ќе забележат повлекување, вознемиреност, заканувачки или вознемирувачки објави и друго необично однесување.“
„Во исто време, ги повикуваме пријателите, соучениците и сите корисници на социјалните мрежи: доколку забележат објави со содржина што се однесува на самоповредување, безнадежност или најави за самоубиство, веднаш да ги користат механизмите за пријавување на оваа платформа и доколку го знаат идентитетот на лицето, да го известат родителот, старателот, наставникот, друго постаро лице или најблиската полициска станица“, велат од Министерството за внатрешни работи.
„Навремениот одговор може да спаси човечки животи. Споделената одговорност, вниманието и грижата се од суштинско значење за спречување на трагедии. Секторот за сајбер криминал останува посветен на заштитата на граѓаните во дигиталниот простор и ќе продолжи со засилени активности насочени кон рано откривање и спречување на опасни појави“, нагласува Министерството за внатрешни работи.
The post Македонската полиција спречи самоубиство на малолетник откако објави на социјалните мрежи appeared first on Во Центар.
