Максимално искористете ја сезоната на јагоди и испробајте го овој рецепт за палачинки, полнети со ова омилено сезонско овошје.
Овие палачинки со чоколаден вкус содржат какао и затоа уште подобро одговараат со слатко-киселиот вкус на јагодите.
Потребни состојки (за 8-10 палачинки):
– 2 јајца
– 2 големи лажици шеќер
– 1 голема лажица какао
– прстофат сол
– 120 гр. брашно
– 50 гр. путер
– 200 мл. млеко
– 100 мл. вода
Состојки за филот од јагоди:
– 300 гр. јагоди
– 300 мл. павлака за готвење
– 2 големи лажици шеќер
Начин на припрема:
1. Најпрвин припремете ја смесата за палачинки која мора да отстои барем еден час за сите состојки да се поврзат и палачинките полесно да се печат.
2. Истопете го путерот и оставете да се излади. Во посебен сад измешајте го брашното и какаото. Јајцата измиксирајте ги заедно со шеќерот и солта, додајте го стопениот путер и добро промешајте.
3. Потоа, во садот додадете ја мешавината од брашното и какаото, добро промешајте и потоа додајте го млекото и водата.
4. Оставете ја смесата во фрижидер, минимум еден час. Смесата можете да ја припремите и еден ден пред печењето.
5. Отстранете ги дршките од јагодите и добро измијте ги. Исечкајте ги на ситни парчиња, ставете ги во еден сад, додајте две лажички шеќер и оставете ги околу половина час за да пуштат сок. Потоа, додајте ја павлаката, измешајте и ставете ги јагодите во фрижидер.
4. Палачинките испечете ги на класична тава. Кога ќе се изладат, премачкајте ги со филот од јагоди и декорирајте по желба.
Пријатно јадење!
