Соединетите Американски Држави денеска повторно ставија вето на предложената резолуција на Советот за безбедност на Обединетите нации за итен прекин на огнот во Појасот Газа, третпат од почетокот на војната на 7 октомври

Кабинетот на претседателот на палестинската управа Махмуд Абас соопшти дека американското вето во Советот за безбедност на ОН ѝ пркоси на меѓународната заедница и му дава на Израел „дополнително зелено светло за Израел да продолжи со својата окупација и својата агресија врз народот на Газа и да изврши крвав напад врз Рафах“.

Палестинското претседателство, исто така, соопшти дека ја смета американската администрација за одговорна за „поддршката и обезбедувањето заштита на израелските варварски напади“ врз децата, жените и постарите лица во Газа.

„Оваа политика ги прави Соединетите Американски Држави партнер во злосторствата на геноцид и етничко чистење и воените злосторства извршени од израелските сили“,

се вели во соопштението што го објави официјалната палестинска новинска агенција Вафа, пренесува Ал Џезира.

Соединетите Американски Држави денеска повторно ставија вето на предложената резолуција на Советот за безбедност на Обединетите нации за итен прекин на огнот во Појасот Газа, третпат од почетокот на војната на 7 октомври.

Од 15 членки на Советот за безбедност на ОН, 13 гласаа за резолуцијата предложена од Алжир, додека Велика Британија беше воздржана.

„Гласањето за нацрт-резолуцијата е глас за поддршка на правото на живот на Палестинците. Спротивно на тоа, гласот против е поддршка за бруталното насилство и колективната казна што им е нанесена“,

изјави алжирскиот амбасадор во ОН, Амар Бенјама.

Американската амбасадорка Линда Томас Гринфилд денеска изјави дека секоја акција преземена од Советот за безбедност би значела мешање во „чувствителните, тековни преговори“.

„Сметаме дека резолуцијата ќе има негативно влијание врз преговорите. Барањето итен, безусловен прекин на огнот, без договор кој бара од Хамас да ги ослободи заложниците, нема да донесе одржлив мир и само ќе го продолжи конфликтот“,

изјави Гринфилд.

Наместо тоа, САД предложија своја нацрт-резолуција со која се повикува на привремен прекин на непријателствата и се изразува противење на плановите на американскиот сојузник Израел за копнена офанзива во Рафах, пренесе БТА. Вашингтон прецизираше дека нема да бара резолуцијата да ја предложи за гласање за да обезбеди време за преговори.