Полицијата со употеба на солзавец се обидува да спречи стотици мигранти кои утринава го напуштија бегалскиот камп во Солун и се упатија кон границата со Македонија. Во близина на границата се поставени и шатори каде се населиле мигрантите, информираат грчките медиуми, пренесе “Фокус“.
Меѓу нив има и мајки со деца, кои бараат да им се дозволи да ја преминат границата, за да го продолжат својот пат кон Германија. Фрлаат со камења кон полицијата, а таа одговара со шок бомби и солзавец, пренесуваат медиумите.
Како што изјавиле мигрантите одговараат на анонимен повик на социјалните мрежи да стигнат до грчката граница со Македонија, оддалечена 60 километри, и да се обидат да ја пробијат оваа граница, а потоа повторно да тргнат по мигрантската балканска рута, која беше цврсто затворена во 2016 година.