Секторот за киберкриминал при Министерството за внатрешни работи информира дека во текот на последните 24 часа, како дел од редовните активности за следење на дигиталниот простор, на социјална мрежа е откриена објава со содржина што укажува на можна самоубиствена намера од страна на малолетен корисник.
Веднаш по приемот на информацијата, преземени се итни и координирани дејствија, при што се преземени сите потребни мерки и активности за утврдување на идентитетот и локацијата на лицето. За кратко време, корисникот е пронајден, разговаран и е утврдено дека лицето е безбедно и во добра состојба. За инцидентот се информирани и родителите, кои се запознаени со општата состојба и понатамошните чекори.
Овој настан уште еднаш ја истакнува важноста од внимателно следење на однесувањето на младите луѓе во дигиталниот простор. Ги повикуваме родителите да одржуваат редовна и отворена комуникација со своите деца, да покажуваат интерес за нивните активности на социјалните мрежи и веднаш да реагираат кога ќе забележат повлекување, вознемиреност, заканувачки или вознемирувачки објави и друго необично однесување.
Во исто време, ги повикуваме пријателите, соучениците и сите корисници на социјалните мрежи: доколку забележат објави со содржина што се однесува на самоповредување, безнадежност или најави за самоубиство, веднаш да ги користат механизмите за пријавување на оваа платформа и доколку го знаат идентитетот на лицето, да го известат својот родител, старател, наставник, друго постаро лице или најблиската полициска станица.
Навремената реакција може да спаси човечки животи. Споделената одговорност, вниманието и грижата се од суштинско значење за спречување на трагедии. Секторот за киберкриминал останува посветен на заштитата на граѓаните во дигиталниот простор и ќе продолжи со засилени активности насочени кон рано откривање и спречување на опасни појави.
The post Полицијата спречи самоубиство на малолетник од Скопје откако објави на социјалните мрежи appeared first on Во Центар.
