Сем Асгари, поранешниот сопруг на Бритни Спирс, се огласи откако поп-ѕвездата беше уапсена во Калифорнија во среда вечерта поради возење под дејство на алкохол и дрога.
Во интервју за „Фокс њуз“, моделот и фитнес тренер изјави дека „луѓето прават грешки“ и нагласи колку е важно да се почитува приватноста.
„Разбирам кога станува збор за луѓето што прават грешки, но мислам дека секој заслужува приватност и се надевам дека печатот научил нешто од минатото за да ѝ ја даде приватноста што ѝ е потребна“, рече Асгари.
Спирс и Асгари се венчаа во јуни 2022 година по долгогодишна врска, но се разделија само 14 месеци подоцна поради обвинувања за неверство и нестабилно однесување. Нивниот брак официјално беше раскинат во мај 2024 година.
И покрај турбулентниот и краткотраен брак, Асгари нагласи дека сè уште чувствува љубов кон Спирс повеќе од една година по разводот.
„Нашиот брак беше многу реален за мене. Можеше да биде краток, но бевме заедно седум години. Бев вљубен во неа и секогаш ќе ја сакам и секогаш ѝ посакувам се најдобро“, изјави тој за „Пипл“ во август 2025 година.
Спирс, 44, беше уапсена откако полицијата го забележала нејзиното БМВ како скршнува во сообраќајот во Калифорнија во вечерните часови во среда, 4 март. Калифорниската автопатска патрола потврди за „Пејџ Сикс“ дека Спирс е уапсена околу 21:28 часот по локално време во округот Вентура и дека официјално била притворена до 3:02 часот наутро.
Поп-ѕвездата била однесена и во болница на крвен тест за да се утврди нивото на алкохол во крвта пред да биде пуштена од полициската станица во 6:07 часот наутро. Калифорниската сообраќајна патрола соопшти дека Спирс наводно била под дејство на комбинација од алкохол и дрога.
„Тоа беше несреќен инцидент кој е целосно неоправдан. Бритни ќе ги преземе вистинските чекори и ќе го почитува законот, и се надеваме дека ова може да биде првиот чекор кон долгоочекуваните промени што треба да се случат во нејзиниот живот. Се надеваме дека ќе ја добие помошта и поддршката што ѝ се потребни во овој тежок период“, изјави долгогодишниот менаџер на Спирс, Кејд Хадсон, во изјава за Page Six.
Судењето на Спирс е закажано за 4 мај.
Сепак, Асгари не е единствениот поранешен сопруг кој проговори по апсењето. Џејсон Александар, кој беше во брак со Спирс само 55 часа во 2004 година, застана во нејзина одбрана на социјалните мрежи и ја повика јавноста да „забави“ со проценката и да „почека на фактите“.
„Гласините се шират побрзо од фактите, и одеднаш некој е осуден пред вистината да излезе на виделина. Бритни Спирс заслужува исто како и сите други: факти, искреност и фер третман“, напиша Александар на Инстаграм.
Кевин Федерлајн, 47, сè уште не проговорил јавно за апсењето на Спирс.
Еден извор тврди дека неодамнешните мемоари на Федерлајн, „Мислев дека знаеш“, придонеле за надолната спирала што довело до апсењето на Спирс.
„Токму книгата на Кевин ја турна преку работ и оттаму сè тргна надолу. Навистина влијаеше на нејзините емоции“, изјави извор за Page Six.
Двојката се венча во 2004 година и ги доби синовите Шон Престон (20) и Џејден Џејмс (19), пред да се разделат во 2006 година и да се разведат следната година.
The post Поранешниот сопруг на Бритни Спирс за нејзиното апсење: Мислам дека секој заслужува приватност, ѝ посакувам се најдобро appeared first on Во Центар.
