Рускиот и американскиот претседател Владимир Путин и Доналд Трамп имаа телефонски разговор, објави помошникот на рускиот претседател Јуриј Ушаков. Меѓу другото, фокусот беше ставен на Украина и Иран.

Четвртиот разговор меѓу двајцата лидери од почетокот на годината, одржан на иницијатива на американскиот претседател, траеше еден час и 25 минути. Ушаков го оцени како деловен и многу конструктивен.

„Денешниот телефонски разговор меѓу двајцата шефови на држави започна со тоа што претседателот Владимир Путин лично им честиташе на Доналд Трамп и на целиот американски народ за значаен празник, потсетувајќи на придонесот на Русија во формирањето на американската државност“, рече Ушаков.

Претседателите разговараа за актуелните меѓународни прашања, вклучително и Украина, како и за плановите на американскиот лидер да учествува на самитот на НАТО во Турција. Путин наводно го информирал Трамп за фактичката состојба на бојното поле, истакнувајќи дека руските сили напредуваат по целата линија на контакт.

„Руската страна уште еднаш нагласи дека приоритет се дава на политичко и дипломатско решавање на конфликтот, со задолжително почитување на добро познатите принципиелни позиции на Русија“, рече Ушаков.

Трамп, според него, ја потврдил својата подготвеност да придонесе за што поскоро прекинување на непријателствата и барање мирно решение, со посредство на неговиот специјален пратеник Стив Виткоф и зетот Џаред Кушнер.