Украинскиот претседател Володимир Зеленски денес изјави дека Украина е подготвена веднаш да одржи состанок со Русија на највисоко ниво за да се разговара за прекин на огнот и крај на војната.
„Русите не се подготвени за прекин на огнот. Нивната делегација смета дека тоа е прашање што може да го решат само лидерите на двете земји. Тие самите рекоа дека прекинот на огнот е прашање за повисоко ниво. Ние сме подготвени за состанок веднаш – каде и да посакаат: Истанбул, Ватикан, Швајцарија – сите опции се отворени. Во понеделник или кој било друг ден“, рече Зеленски на прес-конференција, пренесува агенцијата Укринформ.
Украина, според него, предлага прекин на огнот до одржувањето на состанокот меѓу лидерите на двете земји. Претходно, во понеделникот, во Истанбул се одржа вториот круг од преговорите меѓу руската и украинската делегација, кој траеше повеќе од еден час и се одржа во палатата Чираган. По завршувањето на преговорите, украинската страна соопшти дека е постигнат договор за размена на сите тешко ранети и критично болни воени заробеници, како и млади војници на возраст од 18 до 25 години, според принципот „сите за сите“. Исто така, договорено е двете страни да разменат тела на по 6.000 загинати војници.
Киев предложи и состанок на ниво на претседатели до крајот на месецот, со надеж дека тој ќе донесе конкретен напредок во напорите за ставање крај на војната.
