Брокулата и полутврдото сирење се совршена комбинација без разлика дали станува збор за супи и чорби или овие крокети кои можат да се јадат како прилог, но и како самостоен оброк.
За крокетите ви се потребни само неколку состојки кои се печат во рерна, а крајниот резултат е вкусна закуска. Доколку користите лебни трошки, крцкавоста е загарантирана.
Рецепт за неодоливи крокети со брокула и сирење
Потребни состојки:
200 грама сечкана брокула
120 грама рендано полутврдо сирење
50 грама лебни трошки
2 јајца
2 чешниња лук
3 главици млад кромид
сол и бибер по желба
растително масло
Начин на подготовка:
Оставете ја брокулата да се издинста, па издробете ја со вилушка и измешајте ја со изматените јајца, трошките, ренданото сирење, ситно сечканиот лук и младиот кромид.
Додадете сол и бибер по вкус. Од добиената смеса направете топчиња со приближно иста големина.
Ставете ги во сад за печење и намачкајте ги со масло.
Печете во загреана рерна на 200 Целзиусови степени околу 20 до 25 минути сè додека не добијат златно-кафеава боја и не станат крцкави. На здравје!
