„Русија доста брзо снемува муниција, што ја натера Москва да побара помош од други земји, вклучително и од Северна Кореја“, изјави Хејнс за NBC.
Како што рече таа, Соединетите Држави „видeеле одреден напредок“ во снабдувањето со муниција од Северна Кореја, „но тоа не е голема количина во оваа фаза“. Хејнс рече дека Иран и доставил на Русија беспилотни летала и дека Москва бара други вид прецизна муниција од Техеран, што би било „многу загрижувачко во однос на нивната способност“.
Според неа, претстојниот недостиг на муниција е само еден од многуте предизвици со кои се соочува руската армија, а таа ги наведе и проблемите со моралот и логистиката. Таа посочи дека темпото на војната во Украина се чини дека се намалува со почетокот на зимата и дека двете армии ќе се обидат да се ресетираат и да се прегрупираат за дополнителни борби на пролет. Зборувајќи за ефектите од руските напади врз енергетските капацитети на Украина и друга цивилна инфраструктура,
Хејнс рече дека целта на Москва е да ја разниша волјата на Украинците за отпор. Таа изрази мислење дека Русија се обидува да влијае на способноста на Украина да води војна и додаде дека економијата на Киев трпи тешки последици. Таа наведе дека најголем дел од борбите во моментов се водат во источна Украина, околу градот Бахмут и воопшто во регионот на Доњецк и дека темпото на борбите е намалено по повлекувањето на Русија од регионот Херсон минатиот месец.
