Сантос планира да ја повлече „десетката“ на Пеле

Бразилскиот фудбалски клуб Сантос од Сао Паоло откри планови за трајно повлекување на дресот со бројот 10, кој во текот на својата кариера носеше легендарниот Пеле.

Повеќе бразилски медиуми објавија дека ќерките на Пеле, по неговата смрт во четвртокот, побарале од клубот повеќе никој во Сантос да не ја носи легендарната „десетка“.

„Tоа ќе му гo предложиме на Управниот одбор. За такво нешто постои процедура, потребно е да се состанат членовите на Одборот и тоа да го одобрат. Во меѓувреме, со административен акт во текот на идниот месец привремено ќе го укинеме користењето на бројот 10, надевајќи се дека нашиот oдбор ќе ја претвори таа одлука во трајно решение“, изјави претседателот на Сантос, Андре Руеда.

Дресот со бројот 10. во моментов во Сантос го носи венецуелскиот напаѓач Џеферсон Сотелдо, кој од Пеле се збогува со објава на социјалните мрежи: „Носењето на твојот дрес и грижата за него со љубов и почитување е мојата мисија. Ти нè напушти, но твоето наследство и спомените остануваат. Ти благодарам на сè, кралу Пеле“.

Пеле почина во четвртокот на 82-годишна возраст.

Пронајдете не на следниве мрежи:©ПУЛС24.MK Вестите на интернет страницата на редакцијата ПУЛС24.MK може да се користат исклучиво за лично информирање. Без писмена дозвола од ПУЛС24.MK или посебен договор, не е дозволено преземање, користење или реемитување на вестите.