Нападот на Соединетите Американски Држави и Израел врз Иран претставува опасна ескалација што не им користи на ниту една страна и дополнително го дестабилизира Блискиот Исток, изјави кинескиот министер за надворешни работи Ванг Ји.
Шефот на кинеската дипломатија нагласи дека избувнувањето на нова војна во регионот е сериозен удар врз меѓународната безбедност и ги повика сите страни веднаш да ги прекинат непријателствата.
– Војната на Блискиот Исток не требаше ни да започне и таа не им користи на ниту едната страна – рече Ванг Ји .
Кина бара почитување на суверенитетот на Иран и земјите од Персискиот Залив
Кинескиот министер за надворешни работи нагласи дека меѓународното право мора да остане основа за решавање на кризата и предупреди дека воената ескалација може да доведе до поширока регионална дестабилизација.
Потребно е веднаш да се прекинат борбените операции, а суверенитетот на Иран и сите земји од Персискиот Залив мора да се почитува – изјави шефот на кинеската дипломатија.
Во последните денови, Пекинг постојано повикува на политичко и дипломатско решение на кризата, предупредувајќи дека продолжувањето на конфликтот меѓу Соединетите Американски Држави, Израел и Иран би можело да предизвика сериозни последици за стабилноста на Блискиот Исток и глобалната безбедност.
