Доколку сакате да ја доведете физичката кондиција и килограмите во ред, а некако се’ уште не ви се вежба во група, има едно евтино, едноставно и загарантирано решение – пешачење.
Ова е одличен начин за раздвижување посебно ако стилот на живот ви наложува многу седење. Пешачењето помага во согорувањето калории, одличен е начин за намалување на стресот. А помалку стрес = помалку килограми.
Но, во продолжение прочитајте уште неколку „закони“ за пешачењето за да го постигнете резултатот што го посакувате:
– 15.000 чекори дневно: Не отстапувајте. Ова е просекот кој што морате дневно да го направите. Од моментот кога ќе станете од кревет, па до следното заминување на спиење. Иако во почетокот ви изгледа како многу, ќе забележите како постепено го зголемувате бројот на чекори. Важно е да почнете. А и одлично е тоа што зголемувањето на физичката активност нема да го почувствувате така како кога би почнале да вежбате во сала.
– три пати дневно по 20 минути: Ова е рецептот за да го достигнете саканиот број чекори и да ослабите. Исто така, помага за регулација на шеќерот во крвта, што дополнително ја намалува потребата за храна. Истражувањата покажале дека 20 минути три пати на ден е далеку поефикасно отколку 45 минути еднаш дневно. Тоа значи дека пешачењето може да ве спаси од попладневната дремка после ручек, кога килограмите се таложат, а и потребата за благо е зголемена.
– три пати неделно чекорете по угорница: Пешачењето по угорница, што вклучува и искачување по скали, помага во дефинирањето на мускулите, а тоа помага при забрзувањето на метаболизмот. На тој начин ги намалувате калориите дури и кога седите на работа. Почнете три пати неделно да пешачите по угорница, а потоа постепено зголемувајте ја „дозата“.
– интервали на брзо одење: Во текот на пешачењето практикувајте едноминутни интервали со забрзан ритам на чекорење. Така ќе ги зголемите отчукувањата на срцето и ќе согорите повеќе калории. Постепено зголемувајте го времетраењето на интервалот и ритамот. И додека пешачите брзо, движете ги рацете, така ќе топите повеќе калории, ќе ги вежбате рамениците и стомакот.
– вметнете по некоја вежба: На паузите можете да направите по 15-20 клекнувања, склекови или расчекори.
– 1600 калории дневно: Колку калории треба да внесете дневно зависи од повеќе фактори и е индивидуално, но според некои истражувања, поголемиот дел од жените што слабеат со пешачење, се држат до внес на од 1.200 до 1.600 калории, богати со протеини. Ако интензитетот на пешачење ви е послаб, тогаш ќе мора исхраната да биде построга за да го постигнете саканиот резултат. И обратно, ако ја зголемите физичката индустрија, тогаш намалете на внесот калории.
– по подолгиот пат: За да си го зголемите бројот на чекори во секојдневните активности (од дома до паркинг, или одењето на работа и слично), одете по подолгиот пат. Или пак, лифтот заменете го со скали. Можеби нема да ги почувствувате, но овие навидум мали и незабележителни движења ќе создадат разлика.
