Специјалниот претставник на американскиот претседател, Кит Келог, објави дека следната рунда преговори меѓу Русија и Украина би можела да се одржи во Женева.

„Мислиме дека следниот состанок веројатно ќе биде во Женева. Сакавме состанокот да го одржиме во Ватикан и бевме подготвени за тоа, но Русите не го сакаа тоа. Мислам дека Женева би можела да биде следната станица каде што би присуствувале тројца лидери: американскиот претседател Доналд Трамп, рускиот претседател Владимир Путин и Владимир Зеленски“, рече тој, според „Фокс њуз“.

Келог рече дека САД добиле од Украина список на услови за склучување мировен договор. „Треба да го добиеме тоа и од руската страна и да ги обединиме“, рече тој. Да потсетиме, директните преговори меѓу Русија и Украина се одржаа во Истанбул на 16 мај. По состанокот, Москва и Киев се согласија да разменат затвореници според формулата „1.000 за 1.000“, како и да ја презентираат својата детална визија за евентуално идно примирје и да го продолжат процесот на преговори. Помошникот на рускиот претседател Владимир Медински, кој ја предводеше руската делегација, изјави дека руската страна е задоволна од резултатите од состанокот.