Советот на Европската Унија го поздравува фактот дека европската интеграција останува стратешка цел на Северна Македонија и ја повикува да ги интензивира напорите за унапредување на реформите поврзани со ЕУ. Ова е наведено, меѓу другото, во нацрт-заклучоците на Советот за проширување на ЕУ, пред самитот на Унијата и лидерите на Западен Балкан, што ќе се одржи утре, на 17 декември во Брисел, објавува Телеграф Македонија.
Потсетувајќи се на заклучоците од јули 2022 година, Советот забележува дека Северна Македонија сè уште не ги усвоила уставните измени за кои се обврзала.
„Советот ја потврдува својата подготвеност да свика уште една меѓувладина конференција, без понатамошно одложување или дополнителни политички одлуки, откако Северна Македонија ќе ја спроведе оваа обврска, во согласност со своите внатрешни процедури“, се наведува во документот, пренесува REL.
Во заклучоците, исто така, се наведува дека Советот е подготвен да ја отвори првата рунда преговори што е можно поскоро, во согласност со Преговорната рамка.
Нацрт-заклучоците се базираат на претходните извештаи на ЕУ за напредокот на земјите-кандидатки за членство во ЕУ. Покрај Северна Македонија, тие се однесуваат и на другите пет земји од Западен Балкан (Албанија, Црна Гора, Србија, Косово и Босна и Херцеговина), како и на Украина, Молдавија и Грузија.
The post Совет на ЕУ, Северна Македонија: Спроведување на уставни измени и реформи appeared first on Во Центар.
