Односите меѓу американскиот претседател Доналд Трамп и израелскиот премиер Бенјамин Нетанјаху се најдоа во центарот на вниманието на јавноста во последните денови по извештаите за жесток телефонски разговор меѓу двајцата лидери, во кој Трамп наводно го нарекол Нетанјаху „тотално луд“.
Според американскиот портал „Аксиос“, за време на разговорот, Трамп остро реагирал на израелските закани за продолжување на воздушните напади врз јужните предградија на Бејрут. Нетанјаху наводно рекол: „Сега сите ве мразат. Сите го мразат Израел поради ова“.
Подоцна, самиот Трамп јавно потврди дека разговорот бил напнат, признавајќи дека бил „вознемирен“ од постапките на Израел во Либан. Сепак, додаде дека тој и Нетанјаху „добро соработувале“.
Израелски претставници, кои зборуваа анонимно, рекоа дека тоа бил еден од најжестоките разговори што Нетанјаху ги имал со Трамп. Еден од нив рече дека протекувањето на деталите од разговорот во медиумите политички му наштетило на израелскиот премиер пред изборите оваа година.
За време на разговорот, Трамп наводно побарал Израел да ги запре планираните напади врз Бејрут, откако Иран предупредил дека израелските напади во Либан ги поткопуваат преговорите за завршување на војната. Конфликтот започна со заеднички напади на САД и Израел, а според анкетите на јавното мислење, тој е многу непопуларен меѓу американските гласачи.
Од друга страна, израелските власти тврдат дека Нетанјаху му ставил до знаење на Трамп дека секоја пауза во нападите може да функционира само ако Хезболах престане да го напаѓа северен Израел.
По разговорот, Трамп изјави дека Израел и Хезболах се согласиле да ги прекинат меѓусебните напади, што предизвика критики од дел од израелската опозиција, како и од некои членови на владата на Нетанјаху.
Опозицискиот лидер Јаир Лапид го обвини Нетанјаху дека го претвора Израел во „американски протекторат“, тврдејќи дека израелскиот премиер му дал на Вашингтон премногу влијание врз безбедносните одлуки на земјата.
Претседателот на израелскиот тинк-тенк „Митвим Нимрод Горен“ оцени дека разликите меѓу Трамп и Нетанјаху сега се „многу јавни“, за разлика од претходните периоди кога несогласувањата претежно се решаваа зад затворени врати.
Иако Трамп силно го поддржуваше Израел во последните години, вклучително и одлуката за вклучување на САД во нападите врз Иран, дел од израелската јавност верува дека американскиот претседател презел чекори што не биле во интерес на Израел. Меѓу нив се прекинувањето на американските напади врз јеменските Хути, укинувањето на санкциите против сирискиот претседател Ахмед ал-Шарао, како и притисокот за прекин на минатогодишната војна меѓу Израел и Иран.
Ројтерс наведува дека Израел во моментов не е директно вклучен во преговорите меѓу САД и Иран за завршување на војната, кои се водат преку Пакистан, земја која нема формални дипломатски односи со Израел.
Војните против Иран и Хезболах продолжуваат да имаат силна поддршка во Израел, вклучително и меѓу гласачите на политичките противници на Бенјамин Нетанјаху. Сепак, ситуацијата во САД е поинаква, каде што значителен број гласачи, вклучително и дел од конзервативната база на Трамп, не го поддржуваат продолжувањето на конфликтот.
Трамп постојано изјавува дека Америка е блиску до договор со Иран за прекин на војната, додека Техеран инсистира дека секој договор мора да вклучува прекин на израелските напади врз Хезболах во Либан.
Аналитичарите предупредуваат дека ненадејниот крај на конфликтот би можел да претставува сериозен политички проблем за Нетанјаху, бидејќи многу Израелци би го сметале тоа за резултат на американскиот притисок.
„Никој овде не сака да се чувствува како да сме уште една ѕвезда на американското знаме. Сакаме чувство на независност“, рече поранешниот советник на Нетанјаху, Надав Штраухлер.
И покрај тензиите, американските и израелските претставници инсистираат дека односот меѓу Трамп и Нетанјаху останува силен и дека двајцата лидери сè уште делат заеднички ставови за повеќето клучни прашања.
The post Трамповото „Ти си целосно луд“ му предизвика сериозна штета на Нетанјаху: „Работите сега се многу јавни“ appeared first on Во Центар.
