Американскиот претседател Доналд Трамп денес изјави дека демонстрантите во Лос Анџелес „имаат тенденција да плукаат во лице“ на членовите на Националната гарда кои беа испратени во градот за да ги задушат немирите и дека одговорот на гардата ќе биде да ги „удираат“.

„Ако плукаат, ние ќе удриме. Оние кои учествуваат во немирите имаат тенденција да плукаат во лице на членовите на Националната гарда и другите. На овие патриоти им се вели да го прифатат тоа, така функционира животот. Но, не и во администрацијата на Трамп. Ако плукаат, ние ќе удриме и ви ветувам дека ќе бидат удрени посилно од кога било досега. Такво непочитување нема да се толерира“, рече Трамп во објава на својот профил на социјалните мрежи.

Трамп го обвини демократскиот гувернер на Калифорнија, Гевин Њусом, за инспирација на „катастрофалните немири“ во Лос Анџелес, што доведоа до распоредување на Националната гарда на Калифорнија. Немирите во некои делови од Лос Анџелес избувнаа како одговор на дејствијата на Службата за имиграција и царина на САД (ICE), која изврши рации во бизниси во потрага по нелегални работници или имигранти.