Во судницата во Идризово денеска започна судскиот процес за трагедијата во Кочани во која животот го загубија 63 лица.
Покрај обвинетите и бранителите во судницата се присутни и семејствата на загинатите, новинари од земјата и од странство, претставници на ОБСЕ, како и претставници на неколку амбасади.
На почетокот на денешната главна расправа претседателката на судечкиот совет, Дијана Груевска Илиевска, побара дисциплина од сите учесници во постапката, истакна дека нема да се толерираат отсуства од било која страна и ќе следуваат санкции за евентуални неоправдани боледувања.
Претседателката на судечкиот совет истакна дека овој процес не треба да се брза за да не се направат грешки.
„Никој не знае дали ова ќе трае пет месеци или пет години“, нагласи Груевска Илиевска.
Трагедијата во кочанската дискотека ПУЛС се случи на 16.03.2025 година. Во пожарот загинаа 63 лица. Меѓу обвинетите се сопственикот на дискотеката, Дејан Јованов, поранешни градоначалници на Кочани, поранешни министри и останати функционери.
Процесот ќе го води судијката Дијана Груевска Илиевска, а обвинителството ќе биде застапувано од проширен тим од 15 јавни обвинители, со цел да се обезбеди ефикасна и фер постапка.
Обвинителниот акт опфаќа тешки дела против општата сигурност, меѓу кои и сериозни пропусти во организацијата на обезбедувањето на објектот.
Во судницата денес се присутни јавните обвинители Борче Јанев, Владимир Милошевски, Даниел Коцев, Дарко Јакимовски, Снежана Бундалевска, Јасмина Костеска Здравевска, Маја Тоневска, Анастасија Миланова, Славица Темелковска.
