Хамас вели дека е подготвен „да се вклучи позитивно и конструктивно во секој предлог“ заснован на „траен прекин на огнот“

Палестинската милитантна група Хамас објави дека позитивно гледа на содржината на предлогот на американскиот претседател Џо Бајден за траен мир во Газа.

Планот на Бајден кој го претстави вчера предвидува шестнеделен прекин на огнот, потоа преговори за условите за траен прекин на непријателствата и голем план за обнова на Газа.

Хамас вели дека е подготвен „да се вклучи позитивно и конструктивно во секој предлог“ заснован на „траен прекин на огнот“.

„Хамас гледа позитивно на забелешките во говорот на американскиот претседател Џо Бајден и неговиот повик за траен прекин на огнот, повлекување на окупациските сили од Појасот Газа, реконструкција и размена на затвореници“,

се вели во соопштението, пренесува Ал Џезира.

Од Хамас додаваат дека сакаат „враќање на раселените во нивните домови низ Газа и завршување на сериозен договор за размена на затвореници доколку окупацијата експлицитно се обврзе на тоа“.

„Сметаме дека оваа американска позиција и регионалните и меѓународните убедувања за потребата да се стави крај на војната во Газа се резултат на легендарната непоколебливост на нашиот народ и нивниот храбар отпор“,

се вели во соопштението.

Кабинетот на израелскиот премиер Бенјамин Нетанјаху по објавувањето на планот на Бајден соопшти дека тој им наложил на преговарачите да презентираат предлог за прекин на огнот.

Шефот на ОН го поздрави „патоказот“ за прекин на огнот и ослободувањето на заробениците во Газа, објавени од американскиот претседател Бајден.

„Бевме сведоци на премногу страдања и уништувања во Газа. Време е да се запре. Ја поздравувам иницијативата на американскиот претседател Џо Бајден и ги охрабрувам сите страни да ја искористат оваа можност за прекин на огнот, ослободување на сите заложници, гарантиран непречен хуманитарен пристап и на крајот траен мир“,

напиша Антонио Гутереш на Икс.

We have witnessed too much suffering & destruction in Gaza. It’s time to stop.

I welcome @POTUS Biden’s initiative & encourage all parties to seize this opportunity for a ceasefire, release of all hostages, guaranteed unhindered humanitarian access & ultimately a durable peace…

— António Guterres (@antonioguterres) May 31, 2024

Осврнувајќи се на предлогот, Бајден рече дека неговите преговарачи и претставници на разузнавачката заедница изминатите неколку месеци биле целосно фокусирани не само на прекин на огнот во Газа кој, како што додаде, неизбежно ќе биде кревок и привремен, туку на траен крај на војната.