Претседателот на Алијансата за иднината на Косово, Рамуш Харадинај изјави дека прекинот на седницата за конституирање на косовското собрание „произволно“, иако има кворум да продолжи, уште еднаш јасно покажува кои се луѓето кои повеќе од четири години го држат Косово во заложништво.
Харадинај во објава на Фејсбук наведе дека блокирачките, уцените и узурпаторските политики се главните карактеристики на Албин Курти.

„Произволното прекинување на седницата, иако имаше кворум да продолжи, уште еднаш јасно покажува кои се овие луѓе кои го држат Косово како заложник повеќе од четири години. Косово и неговиот парламентарен, демократски и прозападен карактер нема да го потресат каприците и автократските и диктаторските желби на Истокот“, нагласи Харадинај.

Тој му вели на Курти дека работата е прилично едноставна – „оставка – не можете да држите две функции“.

„Предложете го и изберете претседател на Собранието. Формирајте Влада. Ако не можете – заминете. Во спротивно, власта ќе му се врати на народот“, заклучи Харадинај.