Неверојатна приказна пристигнува од Перу, каде што човек со име кое потсетува на двајца од најозлогласените диктатори во светската историја победи на локалните избори. Хитлер Мусолини Симеон Флорес освои најмногу гласови на изборите за градоначалник на малото гратче Керопалка, сместено во централниот дел на перуанските Анди.
Според резултатите објавени од Националната канцеларија за изборни процеси на Перу (ONPE), Флорес освоил 229 гласови, односно 34,54 проценти од важечките гласови, со што се позиционирал како победник на изборите одржани на 4 октомври 2026 година.
Неговиот најблизок противкандидат, Гаспар Бенилде Осорио Замбрано, освоил 204 гласови, додека третопласираната Итала Јована Сантилан Вара добила 187 гласови. Разликата меѓу првопласираниот и второпласираниот кандидат изнесува само 25 гласа.
Но, она што го привлече вниманието на меѓународната јавност не е тесната изборна победа, туку неговото необично име.
Имено, Хитлер Мусолини ги носи имињата на Адолф Хитлер, водачот на нацистичка Германија, и Бенито Мусолини, основачот на италијанскиот фашизам и диктатор кој владеел со Италија повеќе од две децении.
Двајцата биле сојузници за време на Втората светска војна, а нивните режими останале запаметени по воени злосторства, политички прогон и масовни убиства.
Сепак, необичната комбинација на имиња очигледно не претставувала пречка за гласачите во Керопалка, кои му дале најголема поддршка на кандидатот на политичката партија „Ахора Насион“.
Според податоците од перуанската изборна платформа, Флорес има 45 години и е роден токму во Керопалка. Во неговата официјална биографија е наведено дека работел како менаџер во приватна компанија.
Засега нема потврдени информации зошто неговите родители одлучиле да му ги дадат токму овие две имиња, ниту пак постојат докази дека неговите политички ставови се поврзани со идеологиите на историските личности чии имиња ги носи.
Иако станува збор за мала локална изборна трка, приказната привлече внимание и надвор од Перу, покажувајќи дека понекогаш дури и изборите во најмалите населени места можат да станат меѓународна вест.
Според преброените гласови, Хитлер Мусолини Симеон Флорес е виртуелен победник на изборите, додека формалното потврдување на неговиот мандат е посебна изборна постапка.
