Русија, Кина и Иран се најголемите закани за Шведска, објави Шведската служба за безбедност (Сапо) во својот годишен извештај за заканите со кои се соочува земјата.
Безбедносната служба во последните години предупредуваше на зголемени закани, првенствено од руската држава, која е сè повеќе склона кон ризични потези во поддршка на нејзината војна во Украина, вклучително и дестабилизирачки хибридни напади низ цела Европа, се истакнува во неа.
Сапо наведува дека тешката безбедносна ситуација ќе трае долго време и дека Русија, Кина и Иран соработуваат едни со други.
„Заканите за Шведска се сложени. Гледаме дека странските сили и насилните екстремисти дејствуваат на таков начин што заканите се испреплетени и меѓусебно се зајакнуваат. Тие поттикнуваат поделба и поларизација“, изјави шефот на шведската безбедносна служба, Шарлот фон Есен.
Сапо наведува дека развојот на ситуацијата претставува „зголемен притисок врз шведското општество“ и дека настаните во светот дополнително ги зајакнуваат заканите.
Во извештајот, исто така, се предупредува дека странските сили може сè повеќе да ја користат вештачката интелигенција (ВИ) како средство за нарушување на безбедносно чувствителните активности. Покрај тоа, тие може да „ги експлоатираат насилните екстремисти и други видови организации и поединци како посредници за закана кон Шведска, без можност за утврдување на нивната одговорност како иницијатори“.
Според Сапо, Русија и Кина веќе спроведуваат активности што ја загрозуваат безбедноста во северните делови на Шведска: Русија со цел да ги поткопа воените капацитети, а Кина со амбиција да стане голема сила.
The post Шведската безбедносна служба: „Русија, Кина и Иран се најголемите закани за нас, влијанието на насилните екстремисти се зајакнува“ appeared first on Во Центар.
