Новите истражувања сугерираат дека придобивките од откажувањето од алкохол за еден месец одат многу подалеку од едноставното „ресетирање“ после празниците. Една нова студија од Универзитетот во Сасекс во Велика Британија покажува дека откажувањето од секаков алкохол може да донесе низа здравствени придобивки, како што се подобрување на квалитетот на спиењето, повеќе енергија и слабеење.
Студијата следела 800 луѓе кои учествувале во „јануари без алкохол“ (Dry January) минатата година и се пријавувале кај нив во текот на годината. Истражувачите откриле дека оние кои се откажале од алкохолот еден месец изјавиле дека пиеле помалку дури и седум месеци подоцна. Уште повпечатливо – учесниците пријавија низа други трајни придобивки: 70 отсто пријавиле подобрување на целокупното здравје, 71 отсто подобро спиеле, 67 отсто имале повеќе енергија, 58 отсто изгубиле тежина и 54 отсто имале подобра кожа.
„Едноставниот чин на едномесечно отсуство на алкохол им помага на луѓето да пијат помалку долгорочно“, изјави психологот Ричард де Висер од Универзитетот во Сасекс, истакнувајќи дека пошироките здравствени придобивки често стануваат забележливи набргу откако учесниците се откажале од пиењето.
Ако цел месец без пијалак звучи застрашувачки, не грижете се. Откажувањето од алкохол дури и на краток временски период исто така може да биде корисно. Во студијата, учесниците кои не успеале да го поминат целиот месец јануари, сепак забележале здравствени подобрувања, иако не во иста мера како оние кои се откажале од алкохолот 31 ден.
„Ова покажува дека има реални придобивки од обидот да се откажете од алкохол на еден месец“, рече де Висер.
