На Путин му останаа само седум бродови во Црното Море, соопшти Украинската оперативна команда Југ, формација на украинските копнени сили која оперира во јужниот дел на земјата.
Во објава на Фејсбук напишаа дека една од причините за намалувањето на руската флота е невремето.
„Како што се засилува бурното време во Црното Море, непријателската флота е намалена на седум бродови, вклучително и еден подморски носач на ракети“, објави Командата за јужни операции во својата дневна анализа на војната.
Западните медиуми не можеа самостојно да ги потврдат овие бројки, но познато е дека руската Црноморска флота претрпе големи загуби од почетокот на војната. Еден од најголемите удари за руската морнарица беше потонувањето на водечкиот крстосувач Москва.
Москва тонеше неколку часа откако одекнаа неколку експлозии. Иако Русија рече дека експлозиите не се поврзани со нападите, туку со детонацијата на муниција, Украина ја презеде одговорноста, тврдејќи дека биле испукани проектили и предизвикале голема штета.
Олексиј Арестович, советник на украинскиот претседател Володимир Зеленски, објави видео на Твитер за кое тврди дека е видео од нападот.
Уништени се уште најмалку четири бродови на руската Црноморска флота, а Украина го нападна најновиот, Адмирал Макаров, на крајот на октомври. Британското Министерство за одбрана во август оцени дека Русија „има потешкотии во контролирањето на морето“. „Моментално ограничената ефикасност на Црноморската флота ја поткопува целата стратегија за инвазија“, објави тогаш Министерството.
Русија, исто така, ја обвини Украина за минатомесечниот напад врз Севастопол, градот во кој се наоѓа Црноморската флота.
Министерството за одбрана на Русија соопшти дека девет украински беспилотни летала и седум „поморски дронови“ извршиле „терористички напад“ врз бродови на Црноморската флота и цивилни бродови во пристаништето Севастопол.
Пронајдете не на следниве мрежи:
