Многу пијалаци, сосови и храна содржат повеќе шеќер отколку што може да замислите. Затоа, пожелно е секогаш да ги читате етикетите на производите за да се осигурите за тоа колкава количина на додадени шеќери внесувате во организмот.
Истражувањата покажале дека додадениот шеќер, кој е шеќер што се наоѓа во газираните сокови, слатките и другата преработена храна, придонесува за зголемување на ризикот од дебелина, дијабетес тип 2, срцеви заболувања, рак и расипување на забите. Еве на кој начин можете да го ограничите внесот на шеќери во организмот.
Намалете ги пијалаците со шеќер
Газираните и енергетските пијалаци, засладените чаеви – сите тие содржат додатни шеќери. Дополнително, пијалаците кои многу луѓе ги сметаат за здрави, како што се смуди и овошни сокови, можат да содржат неверојатни количини на додаден шеќер. На пример, 1 чаша (271 грама) коктел од сок од брусница содржи повеќе од 7 лажички шеќер (31 грама). Еве неколку поздрави опции за пијалаци кои имаат малку шеќер:
вода
незасладена газирана вода
билни чаеви
црн или зелен чај
кафе
Избегнувајте слатки десерти
Повеќето десерти немаат хранливата вредност. Тие се полни со шеќер, што предизвикува скокови на шеќерот во крвта, а тоа може да ве натера да се чувствувате уморни и гладни и да ја зголеми вашата потреба од шеќер. Затоа, обидете се со овие алтернативи:
свежо овошје
грчки јогурт со цимет или овошје
печено овошје со крем
темно чоколадо (70% какао или повеќе)
Избегнувајте сосови со додаден шеќер
Сосови како кечап, сос за скара, сос за шпагети и сладок чили сос се вообичаени во повеќето кујни. Сепак, повеќето луѓе не се свесни за нивната содржина на шеќер. Само 1 лажица (17 грама) кечап содржи околу 1 лажичка (5 грама) шеќер. Побарајте зачини и сосови со ознака „без додаден шеќер“ за да го намалите внесот на шеќери.
Проверете дали има шеќер во конзервираната храна
Конзервираната храна може да биде корисен и евтин додаток на вашата исхрана, но таа може да содржи и многу додаден шеќер. Овошјето и зеленчукот содржат природни шеќери. Сепак, тие обично не се проблем бидејќи тие не влијаат на вашиот шеќер во крвта на начин на кој влијае додадениот шеќер. Ако купувате конзервирано овошје или зеленчук кои имаат додаден шеќер, можете да отстраните дел од него со тоа што ќе ги исплакнете во вода пред да ги консумирате.
Внесувајте повеќе протеини
Високиот внес на шеќер е поврзан со зголемен апетит и зголемување на телесната тежина. Спротивно на тоа, исхраната со малку додаден шеќер, но богата со протеини и влакна може да има спротивен ефект и може да придонесе да се чувствувате сити подолго време. Исто така, докажано е дека протеините можат да ја намалат желбата за шеќер. Една студија покажала дека зголемувањето на протеините во исхраната за 25% ја намалува желбата за шеќер за 60%. Со други зборови, консумирајте повеќе храна богата со протеини, како што се месо, риба, јајца, полномасни млечни производи, авокадо и јаткасти плодови.
