Авторот на вооружениот напад во Арачиново и понатаму е на слобода. Министерот за внатрешни работи не излезе со дополнителни информации за ниту едно од лицата кои се сомничат дека се вмешани во случајот. Тој не прецизираше дали ова лице е вмешано или не, но нагласи дека ќе има дополнителни информации. Сепак, моментално напаѓачот е на слобода.

Тошковски пред два дена соопшти дека на денот на нападот било уапсено уште едно лице, но во меѓувреме било тргнато од списокот на осомничени, а се гони за друго кривично дело за кое имало меѓународна потерница.

Во понеделникот градоначалникот на општината Ридван Ибрахими беше цел на вооружен напад. При општинска активност на главниот пат што ги поврзува Скопје и Куманово, вооружено лице со возило запрело во близина на местото каде што се одвивале активностите и со калашников пукало кон Ибрахими. Тој не беше повреден, но со рани се здобија неговиот возач и еден вработен во општината.