Македонскиот ракомет доби нов шести претседател во историјата. Младиот стопанственик Александар Стефанов е избран за претседател на Ракометната федерација на Македонија (РФМ) и ќе го наследи најуспешниот прв човек во историјата на мак-ракометот Живко Мукаетов.

Александар Стефанов е поранешен ракометар и сегашен главен спонзор на ракометниот суперлигаш Бутел Скопје, преку компанијата Фабрика Карпош АД Скопје каде е член на Управниот одбор.

На собранието Стефанов беше единствениот кандидат за претседателската функција, па ја доби довербата да раководи со мак-ракометот.

Новиот претседател на ракометната централа ќе биде шести во историјата на независна Македонија, а покрај Живко Мукаетов (2013-2025), со функцијата раководеа Михајло Михајловски (2008-2013), Трифун Костовски (2003-2008), Душко Кадиевски (1999-2003) и Иван Бојков (1989-1999).