Американскиот претседател Доналд Трамп потпиша наредба со која се воведуваат дополнителни тарифи од 25 проценти за увоз од Индија, бидејќи земјата купува нафта од Русија, објави Белата куќа.

Порано, официјалниот претставник на индиското Министерство за надворешни работи, Рандхир Џајсвал, изјави дека Индија ги смета нападите на САД и Европската Унија за увоз на руска нафта за неосновани и неразумни и дека ќе преземе мерки за заштита на своите интереси и економска безбедност. Портпаролот на Кремљ, Дмитриј Песков, изјави дека барањата на Западот до разни земји да престанат да тргуваат со Русија се нелегални.

Изјавите и заканите што доаѓаат од одредени западни земји имаат за цел да ги принудат суверените држави да ги прекинат трговските односи со Русија, рече Песков. „Слушаме многу изјави што во суштина се закани – обиди да се принудат земјите да ги прекинат трговските односи со Русија“, им рече Песков на новинарите, одговарајќи на прашање дали Кремљ гледа закана за рускиот извоз на енергија.