Тројца работници го загубија животот, а двајца се тешко повредени во тешка сообраќајна несреќа што утринава се случи на експресниот пат Штип – Радовиш, во близина на селото Лакавица, кога комбе излетало од мостот на Балталиска Река.

Директорот на ЈЗУ Здравствен дом „Панче Караѓозов“, Горан Андонов, изјави за МИА дека медицинскиот тим на Итната медицинска помош на лице место констатирал смрт кај двајца патници, додека трет работник, иако бил реанимиран, подлегнал на повредите.

Според првичните информации, загинатите се странски државјани од Бангладеш, кои биле работно ангажирани за струмичка компанија. Во несреќата повредени се уште еден работник и возачот на комбето.

Директорот на Клиничка болница – Штип, Владко Захариев, потврди дека кај нив е хоспитализирано едно лице, кое во моментов е подложено на детални лекарски прегледи.