Во скопското село Трубарево попладнево избувна голем пожар проследен со серија експлозии, откако се запалиле литиумски батерии и електричен отпад во два погони на фирмата „Ф – ГРУПАЦИЈА“.
Темниот облак од пожарот во Трубарево се рашири над главниот град Скопје. Ветерот го насочи кон запад, па облакот се надвисна и над зградата на Владата. Миризбата на изгорено се чувствува насекаде, велат скопјани. Засега нема официјални информации за тоа што гори, и дали облакот со себе носи опасни материи.
Во исто време додека Скопје се соочува со една од најголемите еколошки катастрофи во својата историја, првиот вицепремиер и министер за животна средина, Изет Меџити тера кампања за локалните избори.
На терен интервенираат два полициски хеликоптери и авион „ер трактор“ на Дирекцијата за заштита и спасување, а пламенот и густите облаци чад се видливи од речиси сите делови на Скопје.
Согорувањето на батериите е причина за гласните експлозии кои постојано одекнуваат и предизвикуваат вознемиреност кај жителите во околината. Засега нема информации за повредени лица.
Екипите на Противпожарната бригада, полицијата и Дирекцијата за заштита и спасување остануваат на терен сè додека пожарот не биде ставен под контрола.
