Иако повеќето готвачи ги фрлаат лушпите од кромид без двоумење, тие можеби пропуштаат голем број здравствени придобивки. Лушпите од кромид, кои често завршуваат во ѓубре, всушност се потценет извор на влакна и антиоксиданси, а нивното користење може значително да го намали отпадот од храна во домаќинството, пишува Health.com.
Ако не ви пречи вкусот, лушпите од кромид можат да бидат одличен извор на голем број антиинфламаторни хранливи материи, изјави за „Health“ Ерин Палински-Вејд, регистриран диететичар.
,,Лушпите од кромид се вистинска хранлива бомба во споредба со внатрешните слоеви“, забележа таа.
Богато со антиоксиданси
Надворешните слоеви на кромидот се богати со антиоксиданси. Кората на црвениот кромид е особено добар извор на флавоноидот антоцијанин, додека кората на другите видови кромид е богата со кверцетин. И двете соединенија помагаат во борбата против слободните радикали кои можат да предизвикаат болести.
Иако флавоноиди се наоѓаат и во остатокот од кромидот, нивната концентрација во кората е значително поголема – правот направен од кората може да содржи до десет пати повеќе кверцетин отколку внатрешните слоеви.
Добар извор на растителни влакна
Лушпите од кромид содржат повеќе диететски влакна од повеќето други зеленчуци. Со оглед на тоа што голем дел од населението не ја консумира препорачаната дневна количина на влакна, нивното додавање во исхраната може да биде корисно. Студиите ја поврзаа исхраната богата со влакна со подобро варење, постабилно ниво на шеќер во крвта, понизок холестерол, превенција од рак и поголемо чувство на ситост.
Помалку отпад од храна
Голема предност на користењето лушпи од кромид е тоа што го намалуваат отпадот од храна, вели д-р Меган Мејер, истражувач за нутритивна имунологија.
,,Се проценува дека во некои земји, 300-500 килограми лушпи од кромид се фрлаат секој ден. Во САД, околу 30-40 проценти од залихите на храна се фрлаат“, рече таа.
,,Обожавам да пронаоѓам нови начини да ги користам сите делови од храната.“
Некои компании веќе додаваат лушпи од кромид во преработената храна за да го намалат отпадот и да ја зголемат хранливата вредност на производот.
„Истражувањата што ги користат лушпите од кромид како состојка во тестенините покажаа дека лушпите ги подобруваат хранливите својства на тестенините“, вели Мајер.
„Затоа лушпите од кромид се користат во храна како леб без глутен, леб од пченица и месен леб.“
Дали постојат некакви ризици?
Лушпите од кромид се безбедни за консумирање во мали количини, но не се препорачува да се јадат сурови. Тешки се за џвакање и можат да претставуваат опасност од задушување, предупредува Палински-Вејд. Исто така, тешко се варат, „особено за оние со чувствителен стомак или синдром на иритабилни црева“.
Друг потенцијален ризик се остатоците од пестициди, поради што се препорачува да се избере органски кромид или лушпите да се мијат многу темелно. Надворешните слоеви исто така имаат поголема веројатност да бидат контаминирани со бактерии, па затоа е важно да се следат правилата за безбедно ракување со храна: чистење, одвојување, готвење и ладење.
Како да користите лушпи од кромид?
Еден од најлесните начини да користите лушпи од кромид е да ги додадете во зеленчукова или пилешка супа.
„Можете да готвите лушпи од кромид и во супи или чорби за да ја зголемите длабочината на вкусот“, предлага Мејер. Само не заборавајте да ги процедите лушпите пред сервирање.
„Друга забавна опција е да се исушат и сомелат чистите лушпи во фин прав што ќе се користи како зачин, или дури и да се измешаат во печива како колачиња за подобар вкус со хранлив поттик“, додаде Палински-Вејд.
The post Здравствени придобивки од лушпите од кромид: Зошто не треба да ги фрлате appeared first on Во Центар.
