Вишиот суд во Белград денеска се очекува да ја изрече втората првостепена пресуда за Владимир и Милјана Кецмановиќ, родителите на момчето кое уби девет свои врсници и еден чувар на училиштето и повреди уште шест лица во основното училиште „Владислав Рибникар“ на 3 мај 2023 година.

Во завршните зборови, главниот јавен обвинител на Вишото јавно обвинителство во Белград, Ненад Стефановиќ, му предложи на судот да ги осуди Кецмановиќ на максимални затворски казни, имено, за Владимир Кецмановиќ предложи единствена затворска казна од 14 години и 11 месеци, а за Милјана Кецмановиќ затворска казна од три години.

Од друга страна, одбраната побара ослободителни пресуди, наведувајќи дека наводите во обвинението не се докажани, односно дека нема докази дека обвинетите ги сториле кривичните дела за кои се товарат.

Завршните зборови на претходното судење ги изнесоа адвокатите на оштетените и самите оштетени, членови на семејствата на убиените лица.

Одбраната и обвинителството ќе имаат право да поднесат жалба на пресудата што судот ќе ја донесе денеска до Апелациониот суд во Белград.

Ова судење се повторува бидејќи Апелациониот суд во Белград ја поништи првостепената пресуда со која Кецмановиќ беа осудени на повеќегодишни казни и наложи повторно судење.

Владимир Кецмановиќ беше осуден на 14 и пол години затвор со првостепената пресуда за кривичните дела занемарување и злоупотреба на малолетно лице и тешко дело против јавната безбедност, додека неговата сопруга Милјана Кецмановиќ беше осудена на три години затвор за кривичното дело занемарување и злоупотреба на малолетно лице.

Момчето Коста.К., кое немало 14 години во времето на злосторството и затоа не е кривично одговорно, ги застрелал своите другари со два пиштоли на неговиот татко што ги зел од сефот на 1 мај 2023 година.

Потоа, два дена подоцна, ги ставил во ранецот, отишол на училиште и за време на првиот час убил девет ученици и еден чувар на училиштето, а ранил уште пет деца и наставничката по историја.