Владата веќе работи на измени во регулативата за увоз на млеко во прав и палмино масло, а паралелно се подготвуваат мерки за намалување на резервите во млечните фабрики и поддршка на домашните производители на млеко, изјави денес премиерот Христијан Мицкоски, одговарајќи на новинарско прашање дали владата планира помош за секторот.
Според Мицкоски, актуелните проблеми во млечната индустрија се резултат на претходните измени во регулативата што ги олеснија условите за увоз.
„Но, прво треба да го пронајдеме виновникот, односно да го дијагностицираме проблемот. Додека проблемот го создаде пред неколку години претходната влада, со измени во регулативата, со кои се намалија критериумите за увоз на млеко во прав и палмино масло. Ова е суштината. Оттука доаѓа она што се случува денес“, рече премиерот.
Тој нагласи дека во моментов млекарниците имаат значителни резерви, што директно влијае на откупот на сурово млеко од земјоделците и на откупните цени.
„Млекарниците имаат магацини полни со производи направени од преработено млеко. Ова се одразува на обемот на откуп на млеко од страна на земјоделците и, секако, влијае на цената, која паѓа“, нагласи Мицкоски.
Тој додаде дека ситуацијата не е единствена за земјата, туку е присутна и во земјите од регионот. Како дел од мерките, најави тој, Владата работи на воспоставување построги критериуми за увоз на млеко во прав и за економските оператори кои го увезуваат, со приоритет на заштитата на домашните производители.
„Новата регулатива воведува построги критериуми во однос на млекото во прав и економските оператори што го увезуваат. Во наредниот период, наш главен интерес се локалните земјоделци, односно производителите на млеко од нашата земја“, нагласи премиерот.
Мицкоски најави и активности за стимулирање на договори меѓу производителите и преработувачите на млеко, како и обезбедување средства од општествено одговорни компании за откуп на вишок производи од магацините на млекарниците.
Воедно, тој потсети дека по завршувањето на ребалансот на буџетот, ќе дојде и до исплатата на субвенциите за 2025 година, нагласувајќи дека Владата работи на надминување на ситуациите наследени од претходниот период.
„Секако, откако ќе заврши ребалансот на буџетот, ќе се исплаќаат и субвенциите за 2025 година. Само за потсетување, во 2024 година, субвенциите за 2023 година не беа исплатени кога ја презедовме власта. Сега зборуваме за субвенции што ќе се исплаќаат за 2025 година, што значи дека процесот е во тек“, нагласи Мицкоски.
The post Мицкоски: Владата подготвува мерки за поддршка на производителите на млеко appeared first on Во Центар.
