Седум грчки острови во Егејското Море прогласија вонредна состојба поради суша, во момент кога туристичката сезона го достигнува својот врв и потрошувачката на вода нагло расте.Меѓу најпогодените е островот Астипалеа, каде што главниот резервоар е наполнет само околу една шестина од својот капацитет. Локалните власти биле принудени да го прекинат наводнувањето на земјоделските површини за преостанатата вода да се зачува за основните потреби на населението и туристичкиот сектор.Земјоделците се соочуваат со сериозни проблеми и дел од нив мора да користат соленкаста вода од бунари, што дополнително го загрозува производството. Истовремено, хотелите и туристичките објекти трошат големи количества вода за туширање, перење, базени и одржување.За да се спречат рестрикции, на островот итно е поставена привремена постројка за десалинизација, а се подготвува и дополнителен капацитет. Дел од хотелите ги охрабруваат гостите да не бараат секојдневно менување на постелнината и крпите.Грчката влада одобри околу 15 милиони евра за подобрување на водоснабдувањето на повеќе острови, од кои 1,5 милиони евра се наменети за Астипалеа.Проблемот, сепак, не се смета за привремен. Научниците предупредуваат дека поради потоплите лета и неправилните врнежи, недостигот од вода може да стане една од најголемите закани за грчките острови, нивното население и туризмот.
The post ДРАМА НА ГРЧКИТЕ ОСТРОВИ: Туристите пристигнуваат, а резервите на вода исчезнуваат appeared first on Во Центар.
