Централното претседателство на ВЛЕН одржа редовна седница на која се разговараше за актуелните политички случувања и беа потврдени приоритетите за претстојниот период.
По седницата, од ВЛЕН испратија соопштение. Во него се наведува дека усвојувањето на предлогот за правосудниот испит во Владата претставува историски исчекор, со кој за првпат се предвидува полагање на испитот и на албански јазик. Ги слушнавме студентите и се заложивме ова прашање да добие институционално решение.
Потоа, се осврнуваат и на Охридскиот договор.
„Охридскиот договор не е сопственост на која било политичка партија. Тој е историско достигнување и резултат на жртвите што албанскиот народ ги поднесе за рамноправност. По повеќе од две децении чекање, правичната и соодветна застапеност на сите етнички заедници мора да биде загарантирана со закон. Донесувањето на Законот за правична и соодветна застапеност останува наша клучна заложба. Апсурдно е да се повикувате на Охридскиот договор, а да го блокирате неговото унапредување. Одговорноста за заокружување на овој процес ја носат сите парламентарни партии што се изјаснуваат за поддршка на Охридскиот договор“, велат од ВЛЕН.
Од таму додаваат дека остануваат посветени и на донесувањето на предложениот закон за трансформација во редовен работен однос, со кој лицата што ги исполнуваат условите ќе добијат вработување на неопределено време.
„И покрај блокадите на Законот за правична и соодветна застапеност од опозицијата, ние и без алатката „Балансер“ докажуваме дека со ВЛЕН вратите за Албанците во јавната служба се широко отворени. Работното место не смее да биде средство за политички уцени“, велат од ВЛЕН.
Од таму велат дека владиното партнерство е стабилно.
„ВЛЕН останува посветен на исполнување на програмските приоритети ветени пред граѓаните. Во таа насока сметаме дека целокупната ефикасност на актуелната Влада треба да се цени во полн мандат. Новиот извештај на Европската комисија го оценуваме како реален и објективен приказ на напредокот и предизвиците што остануваат. Членството во Европската Унија останува наша стратешка цел и одговорност кон граѓаните. Претставниците на ВЛЕН во Владата, Собранието и локалната власт ќе продолжат да работат на остварувањето на сите зацртани приоритети“, соопштија од партијата.
The post ВЛЕН: Остануваме посветени на исполнувањето на ветувањата пред граѓаните appeared first on Во Центар.
