Синоќа на булеварот Србија во скопската населба Ново Лисиче се случи тешка сообраќајка во која тешко се повредени три лица. Комбе со велешки регистерски таблички на пешачки премин удрил во баба, дедо и нивното внуче, информираат жителите на оваа скопската населба на социјалните мрежи.
Бабата и детето веднаш биле пренесени во Ургентниот центар.
Еве што за овој случај пишуваат жителите од општина Аеродром по социјалните мрежи.
„Господине Марин (градоначалник на Аеродронм-н.з.), пред 10-на минути, на булеварот Србија, на пешачкиот премин пред полициската станица, беа „собрани”, со брзината на светлината, баба, дедо и нивното внуче. Детето го вадевме од под автомобилот. Бабата повредена, ја реанимираа на лице место. Детето го однесоа со брза помош веднаш после бабата. Дедото, во бесознание, со тупаници, се удираше по главата и лелекаше. Ве молам, заземете се веднаш, да поставите семафори на тој пешачки премин. Растојанието, од едните до другите семафори, е големо. Да се премине пешачкиот премин на тоа место, е еднакво на добивка 7-ца на Лото. Многу деца, одат на училиште од другата страна на булеварот, кон Аеродром, и обратно. Се надевам, дека сериозно ќе го разгледате овој предлог, и ќе го ставите на листата со приоритети. Благодарам“.
Официјални информации од МВР се очекуваат во текот на денот.
