Унгарскиот премиер Виктор Орбан за време на самитот на лидерите на ЕУ го критикуваше актуелното европско раководство и повика на промени во Брисел.
„Резултати на актуелното европско лидерство: Зелената транзиција: неуспешна. Земјоделската политика: неуспешна. Конкурентност: неуспешна. Миграциската политика: не успеа. Потребна ни е промена во Брисел“, рече Орбан на социјалната мрежа Х.

Вечерва во Брисел почна вонредниот дводневен самит на Европскиот совет на кој лидерите на ЕУ треба да разговараат за економските прашања, како и за односите со Турција, ситуацијата во Украина, но и на Блискиот Исток, по последната ескалација на конфликтот за време на викендот, кога Иран го нападна Израел со ракети и беспилотни летала.
Според нацрт-изјавата што ја видел Ројтерс, лидерите на ЕУ ќе го осудат нападот на Иран, ќе ја потврдат посветеноста на безбедноста на Израел и ќе ги повикаат сите страни, вклучително и Либан, да спречат понатамошни тензии.
„ЕУ е подготвена да преземе дополнителни рестриктивни мерки против Иран, особено во однос на беспилотните летала (UAVs) и ракетите“, се наведува во текстот.