Шефот на американската компанија за здравствено осигурување „ЈунајтедХелткер“, Брајан Томпсон, е убиен на улица во Њујорк. Педесетгодишниот Томпсон е застрелан во градите околу седум часот по локално време пред хотелот „Хилтон“ во Менхетн, каде што требало да биде говорник на конференција.

Томпсон бил превезен во болница, каде што бил прогласен за мртов, кажаа властите.

Напаѓачот избегал од местото на пукањето и по него се трага. Тој го чекал надвор, а носел скијачка маска и крем јакна, објави полицијата на Њујорк.

Истражителите кажаа дека има видеоснимки од нападот, но мотивот засега не е познат, додавајќи дека од убиениот ништо не било одземено.

Томпсон беше назначен за извршен директор на „ЈунајтедХелткер“ во 2021 и имал годишна плата од 10,2 милиони долари. „ЈунајтедХелткер“ е најголемата приватна осигурителна компанија во САД и најголема за здравствено осигурување во светот.