Злате Лозановски ќе го замени Бранко Геровски

Loading...


По оставката на Бранко Геровски се огласи менаџментот на „Слободен печат“. Текстот ви го пренесуваме интегрално.
Ги известуваме читателите на изданијата на „Слободен печат“ дека главниот и одговорен уредник на печатеното издание на „Слободен печат“, г-динот Бранко Героски поднесе оставка на функцијата што ја вршеше до денеска. Му се заблагодаруваме на г-динот Героски за досегашната работа и неговиот огромен придонес во создавањето на весникот и неговото етаблирање кај читателската публика. Неспорен е фактот дека Героски заедно со неколку други личности е покренувач на денес најтиражниот дневен весник во Република Северна Македонија.
Што се однесува до наводите во оставката на г-динот Бранко Героски, се согласуваме со констатацијата дека постоеле одредени разлики, но според нас тоа беа разлики кои имаа импакт во доменот на бизнис- стратегијата за натамошен развој на одредени сегменти на компанијата „Слободен печат“.
Инаку, кога станува збор за автономноста на уредувачкиот избор на теми и програмска политика, тие секогаш биле и ќе бидат исклучиво право, но и голема одговорност на секој главен и одговорен уредник на весникот.
„Слободен печат“ нема да отстапи од својот курс во определбите да биде критичен кон сите општествени девијации, а во духот на независен, слободоумен и стилски висококвалитетен дневен весник со демократска определба.
На крајот да информираме дека Бранко Героски и натаму останува вработен во компанијата „Слободен печат“ со сите привилегии и бенефиции кои ги уживаше и досега.
Воедно ја известуваме читателската јавност дека на функцијата главен и одговорен уредник на печатеното издание на „Слободен печат“ од денес е именуван досегашниот заменик главен и одговорен уредник, г-динот Злате Лозановски, на кого му посакуваме успешна работа.
Со почит
Менаџментот на „Слободен печат“

loading...