Венецуелските власти денеска побараа интервенција од Организацијата на земјите извознички на нафта (ОПЕК) за да ја сопрат „агресијата“ на САД. Американската војска распореди бродови во Карибите и ја разгледува можноста за воздушни напади врз Венецуела.

Претседателот Доналд Трамп го засили притисокот врз Каракас и претседателот Николас Мадуро, со цел да се справи со трговијата со дрога што, според него, потекнува од Венецуела. Каракас го негира обвинувањето и тврди дека вистинската цел на Вашингтон е промена на режимот и контрола над нафтените резерви во земјата.

Во писмо до ОПЕК, Мадуро наведува дека американската агресија сериозно го загрозува глобалниот нафтен пазар и стабилноста на производството во Венецуела. Писмото беше прочитано на онлајн состанок на организацијата од потпретседателката на Венецуела и министерка за нафта, Делси Родригез.

Трамп, од своја страна, предупреди дека воздушниот простор на Венецуела треба да се смета за „целосно затворен“, по зголемената воена активност во регионот.