Европската Унија ги повика САД и Венецуела на смиреност и воздржаност со цел да се избегне ескалација и да се обезбеди мирно решавање на кризата во Венецуела, соопштија земјите-членки на ЕУ во заедничка изјава.

Дипломатскиот совет на ЕУ во соопштението наведува дека ЕУ потсетува дека принципите на меѓународното право и Повелбата на Обединетите нации мора да се почитуваат во сите околности.
Како што е наведено, членовите на Советот за безбедност на Обединетите нации имаат посебна одговорност да ги заштитат овие принципи, како столб на меѓународната безбедносна архитектура.

ЕУ постојано нагласува дека венецуелскиот претседател Николас Мадуро нема легитимитет на демократски избран претседател и се залага за мирна транзиција кон демократија во Венецуела, предводена од самите Венецуелци, почитувајќи го суверенитетот на земјата, се додава во соопштението.

Исто така, се наведува дека правото на венецуелскиот народ да одлучува за својата иднина мора да се почитува.

ЕУ го дели приоритетот на борбата против транснационалниот организиран криминал и трговијата со дрога, кои претставуваат значителна безбедносна закана во светот. Во исто време, ЕУ нагласува дека овие предизвици мора да се решат преку одржлива соработка, со целосно почитување на меѓународното право и принципите на територијален интегритет и суверенитет, се вели во соопштението.

Во документот се наведува дека ЕУ е во близок контакт со Соединетите Американски Држави, како и со регионалните и меѓународните партнери, со цел да се поддржи и олесни дијалогот со сите вклучени страни, што би довело до „договорено, демократско, инклузивно и мирно решение за кризата, предводено од Венецуелците“. Почитувањето на волјата на венецуелскиот народ останува единствениот начин Венецуела да ја врати демократијата и да ја реши сегашната криза, се додава во соопштението.

„Во овој критичен момент, од суштинско значење е сите актери целосно да ги почитуваат човековите права и меѓународното хуманитарно право. Сите политички затвореници кои моментално се притворени во Венецуела треба да бидат безусловно ослободени“, се нагласува во соопштението.

Соопштението беше поддржано од 26 земји-членки на ЕУ: Австрија, Белгија, Бугарија, Хрватска, Кипар, Чешка, Данска, Естонија, Финска, Франција, Германија, Грција, Ирска, Италија, Латвија, Литванија, Луксембург, Малта, Холандија, Полска, Португалија, Романија, Словачка, Словенија, Шпанија и Шведска. Само Унгарија одби да ја поддржи изјавата.