Израелската армија тврди дека тенковите испукале предупредувачки истрели, но не го погодиле конвојот. Некои Палестинци велат дека војниците пукале директно во нив. Палестински сведок изјави за Би-би-си дека повеќето од загинатите биле прегазени додека камионџиите се обидувале да се пробијат напред

Според последните информации од Газа, најмалку 112 Палестинци загинале, а 760 се повредени додека очајнички се обидувале да ја добијат потребната помош. Толпа луѓе тргнала кон колоната камиони на крајбрежниот пат југозападно од градот Газа, во присуство на израелски тенкови.

Израелската армија тврди дека тенковите испукале предупредувачки истрели, но не го погодиле конвојот. Некои Палестинци велат дека војниците пукале директно во нив. Палестински сведок изјави за Би-би-си дека повеќето од загинатите биле прегазени додека камионџиите се обидувале да се пробијат напред.

Израелските снимки од воздух покажуваат стотици луѓе на и околу камионите, додека графичките видеа објавени на интернет покажуваат како тела се товарат во испразнети камиони со помош и колички влечени од магариња.

Бајден изрази загриженост

Наведувајќи ги бројките од 112 загинати и 760 повредени, Министерството за здравство на Газа управувано од Хамас го обвини Израел за масакр. Советот за безбедност на ОН закажа вонреден состанок зад затворени врати за да разговара за инцидентот.

Франција рече дека „отворањето оган од израелски војници врз цивили кои се обидуваат да добијат храна е неоправдано“. Американскиот претседател Џо Бајден изрази загриженост дека инцидентот може да ги искомплицира напорите на посредниците кои се обидуваат да обезбедат примирје во војната меѓу Израел и Хамас.

Организацијата Лекари без граници објави дека е „згрозена“ и повика на „итен и одржлив прекин на огнот“. Инцидентот се случи неколку часа пред Министерството за здравство на Газа да објави дека повеќе од 30 000 луѓе, вклучувајќи 21 000 деца и жени, биле убиени во Газа од почетокот на актуелниот конфликт на 7 октомври.

Конвојот од 30 камиони превезувал египетска помош

Оттаму додаваат дека 7 000 се исчезнати, а 70 450 се повредени. ОН предупредуваат на претстоен глад на северот од територијата, каде што околу 300 000 луѓе живеат со малку храна и чиста вода. За потсетување, Израелците започнаа голема воздушна и копнена кампања за уништување на Хамас откако Хамас уби околу 1 200 луѓе во јужен Израел и зеде 253 заложници.

Инцидентот во четвртокот се случил непосредно по 04:45 часот по локално време на кружниот тек Набулси, на југозападниот раб на градот Газа. Конвој од 30 камиони со египетска помош се движел на север по она што израелските одбранбени сили (ИДФ) го опишаа како „хуманитарен коридор“.

Конвојот бил опколен од цивили, а луѓето почнале да се качуваат на камионите.

„Некои почнаа насилно да туркаат, па дури и да ги газат другите жители на Газа до смрт, ограбувајќи ги хуманитарните резерви. Немилиот инцидент резултираше со десетици убиени и повредени луѓе од Газа“,

изјави главниот портпарол на ИДФ, контраадмирал Даниел Хагари.

Сведок: Повеќето од жртвите беа прегазени

Тој истакна дека израелските тенкови „внимателно се обиделе да ја растераат толпата со неколку предупредувачки истрели“, но се повлекле кога работите „излегле од контрола“.

„Не беше извршен напад на ИДФ против хуманитарниот конвој“,

рече тој, инсистирајќи дека израелската армија се обидела да му помогне на хуманитарниот конвој да стигне до својата дестинација.

Друг портпарол на ИДФ истакна дека некои цивили им пришле на израелските војници на блискиот контролен пункт, игнорирајќи ги предупредувачките истрели. Тој призна дека војниците од страв пукале во цивили. Палестински сведок, зборувајќи за Би-би-си, ја опишал паниката на толпата и меѓу возачите, кои се обиделе да се движат напред. Тој тврди дека повеќето од жртвите биле прегазени.

Хамас го отфрли извештајот на ИДФ, повикувајќи се на „непобитни“ докази за „директен оган врз цивили, вклучително и истрели во глава со цел инстант убивање“. Десетици жртви во критична или сериозна состојба биле донесени во блиската болница Ал-Шифа во градот Газа, каде лекарите не беа во можност да се справат со огромниот број пациенти и сериозноста на случаите.

Абас: Израелците извршија грозоморен масакр

Тамер Шинбари, кој го држел телото на својот мртов пријател во болницата, изјавил дека отишол до кружниот тек на Набулси со надеж дека ќе добие вреќа брашно за своето семејство. Тој се пожалил дека израелските војници отвориле оган „и дека камион со хуманитарна помош ги прегази телата“.

Според палестинските власти, сите или повеќето од жртвите кои се лекуваат во две други болници, Камал Адван и Ал-Авда, имаат рани од куршуми или шрапнели. Претседателот на палестинската управа Махмуд Абас, ривал на Хамас со седиште на окупираниот Западен Брег, ги обвини израелските сили за „грозоморен масакр“.

Портпаролот на генералниот секретар на ОН Антонио Гутереш, рече дека го осудува инцидентот и повторно повика на „итен хуманитарен прекин на огнот и безусловно ослободување на сите заложници“. Северна Газа претрпе огромно уништување откако беше во центарот на првата фаза од копнената офанзива на Израел и беше во голема мера отсечена од хуманитарна помош неколку месеци.

Катастрофални нивоа на неухранетост

Минатата недела, Светската програма за храна соопшти дека била принудена да ја прекине испораката на помош во областа, откако нејзиниот прв конвој во последните три недели беше опколен од толпи гладни луѓе во близина на израелски контролен пункт, а потоа одекнаа истрели.

Во вторникот, висок функционер за помош на ОН предупреди дека најмалку 576 000 луѓе низ Појасот Газа – четвртина од населението – се соочуваат со катастрофални нивоа на несигурност во храната, при што едно од шест деца на возраст под две години на север страда од акутна неухранетост.

Десет деца починаа од дехидрација и неухранетост во болниците во северниот дел на Газа во последните денови, соопшти Министерството за здравство.